واقع امتحانى ابن صرمة

و كما قال أحمد ابن السقا
من النهارده مفيش حكومه .. أنا الحكومة .. أنا الحكومة

أنا كمان هقول زيه (اشمعنى هو يعنى)
من النهارده مفيش امتحان .. مفيش غير الرقص و الصاجات .. الرقص و الصاجات

و نذهب إلى قولة سمبل قبل المليون
سالخيـــــــــــر

ازيكو يا حلوين يا اللى لسه منورتوش المدونة
شخباركم
على الله تكونو مناح برشا برشا

يلا .. تشكيلة مصرى على خليجى على شامى على تونسى (اهى بالنيابة عن شمال أفريقيا)

أوم ايه بئه
انزل من بيتنا النهاردة رايح الامتحان و انا ضارب اجدعها بوز
بتاع اربع تشبار كده
و الحياة مغيمة و كلها ريح و صواعق
أصل بعيد عنكو و عن السامعين دى كانت مادة البيه الدكتور رئيس القسم
محدش خياله يسيبه و يسرح منه و يفتكر ان الراجل جهبز من جهابزة الفيزياء و هينشنا امتحان عبقرى من بتاع شغل دماغك العطلانه ياض منك له
كله يقفش فى خياله لأن البيه رئيس القسم من أغبى خلئ الله فى عالم الدكاتره و الجامعيين
الخلاصه ان البوز طلع من مخرجات الحاسه التاسعه
و البيه الدكتور رئيس القسم علم علينا فى الامتحان
و مش اى علامه .. دى خمسه من سته
الحمد لله ربنا سترها و قدرنا نفلت من 3 (و ربنا يستر فيهم) و 2 طلعو بغرزتين فى منتصف الجبهه
كله خارج قرفان بيسب و يلعن
حالة جماعيه من السخط الشديد على البيه رئيس القسم
و انا و اللى نزل عليا بالضحك و التهييس
حالة من الهيبرة كان يلزمها ازاتين بيره مشبرين و كيس شيبسى و جبنه رومى كمزه (بفتح الـ زاى لا ضمها)

و فجأه
نزل عليا الوحى بـ

كله على كله للمبدع عدوية

و كانت معايا ع النوبايل ، و شغلتها و هاتك يا تهليس
النسخه اللى معايا مش بصوت عدوية
لا
صوت مسرسع
حاجه كده لزوم نغمات الموبايل
كوبليه من النص
بس فى الجووووووووووووون

بيقول

كله على كله
لما تشوفو قولو
هو فاكرنا ايه
ايه
مش ماليين عينيه
روح قاله حصل ايه
كله على كله

اسمعوها

كله على كله

و أخرتنا فى السرايا الصفرا على ايد الكليه بنت الـ ....

رشة ميه على باب المدونة

- احم احم ..
- يا رب يا ساتر
- حد خالع راسه .. و لو فيه ، ما هى الموضة دلوقتى بئت خلع الراس
* خالع راسه ؟!!
- ايوا يا محترم ، هى دى الموضه ، و الموضه فيها من كل شكل و كل لون ، و على كل لون يا باتستا
* أفهم من كده إنك هتمشى ورا الموضة ، و مطرح ما ترسى هتدقلها
- هع .. كانش انعزر و لا باع جزر يا محترم
* أمال ناوى على ايه ؟
- و لا أعرف ؟؟ اهى الأيام بيننا .